ზოგადად, ექიმები ერთმნიშვნელოვნად აღიარებენ, რომ ანესთეზიოლოგები მედიცინის ყველაზე ჰუმანური სფეროს წარმომადგენლები არიან. ანესთეზია გაუტკივარებას ანუ იმ მდგომარეობის მიღწევას ნიშნავს, როდესაც პაციენტი ტკივილს ვეღარ აღიქვამს. ეს კი ნებისმიერი სახის ოპერაციის დროს აუცილებელი, საჭირო და ძალიან მნიშვნელოვანია. თბილისის ივანე ჯავახიშვილის სახელობის სახელმწიფო უნივერსიტეტის დიპლომირებულმა მედიკოსმა, ირაკლი შონიამ სწავლა ისრაელის საუნივერსიტეტო კლინიკაში განაგრძო და ანესთეზიოლოგის სპეციალობას დაეუფლა. წლების მანძილზე, მუშაობდა, როგორც საქართველოს წამყვან კლინიკებში, ასევე, ისრაელში, მსოფლიო კლინიკების ტოპ-ათეულიდან ერთ-ერთში - ხაიმ შიბას სამედიცინო ცენტრში. ირაკლი შონიას დიდი გამოცდილება აქვს, როგორც ანესთეზიოლოგია-რეანიმატოლოგიაში, ასევე კარდიოანესთეზიოლოგიაში.