მედიცინის დოქტორსა და სრულ პროფესორ ირაკლი ავაზაშვილს 40 წელზე მეტი კლინიკური, პედაგოგიური და სამეცნიერო გამოცდილება აქვს. ის „ამერიკული ჰოსპიტალი თბილისის“ ექიმი რენტგენოლოგია. ამბობს, რომ სხვადასხვა დაავადებების დიაგნოსტირების დროს, რადიოლოგიას გადამწყვეტი მნიშვნელობა აქვს, რადგან ამ მეთოდის გარეშე კლინიცისტები დიაგნოზს ვერ დასვამენ. ულტრათანამედროვე აპარატურის საშუალებით, ექიმ რადიოლოგებს კლინიკური სიმპტომების ვიზუალიზაციის შესაძლებლობა აქვთ. როგორც თავად განმარტავს, კლინიცისტებისგან განსხვავებით, რომლებსაც ამა თუ იმ დაავადებაზე ეჭვი აქვთ, რენტგენოლოგები კონკრეტულ დაავადებას აბსოლუტური სიზუსტით ხედავენ. ირაკლი ავაზაშვილმა პოსტდიპლომური სწავლება რენტგენოლოგიაში რუსეთსა და ბელორუსში გაიარა. წლებია პროფესორი ირაკლი ავაზაშვილი რეზიდენტურას ხელმძღვანელობს „რადიოლოგიაში“, არის ავტორი გამოგონების - „მსხვილი ნაწლავის პირობითი ფართობის მოცულობისა და პერიმეტრის განსაზღვრის მეთოდი“. ის ასევე 25 სამეცნიერო სტატიის და სტუდენტებისთვის დამხმარე სახელმძღვანელოს ავტორია. ირაკლი ავაზაშვილი საქართველოს რადიოლოგთა ასოციაციის გამგეობის წევრია.