ძუძუს კიბო იწყება მაშინ, როდესაც მკერდის ჯანსაღი უჯრედები იცვლება და იზრდება უკონტროლოდ. უკონტროლოდ გაზრდილი უჯრედები ქმნიან უჯრედების მასას, რასაც სიმსივნე ეწოდება. სიმსივნე შეიძლება იყოს კეთილთვისებიანი და ავთვისებიანი. ავთვისებიანია, როდესაც იზრდება და ვრცელდება სხეულის სხვა ნაწილებში, ხოლო კეთილთვისებიანია, როდესაც იზრდება და არ ვრცელდება.

მიუხედავად იმისა, რომ სარძევე ჯირკვლის კიბო ყველაზე ხშირად ვრცელდება ახლომდებარე ლიმფურ კვანძებზე, ძუძუს კიბო მაინც განიხილება, როგორც ლოკალური დაავადება. ის შეიძლება გავრცელდეს ორგანიზმში სისხლძარღვების, ან ლიმფური კვანძების საშუალებით ისეთ ადგილებში, როგორებიცაა ძვლები, ფილტვები, ღვიძლი და ტვინი. ამას ეწოდება მეტასტაზური ან სარძევე ჯირკვლის მეოთხე სტადიის კიბო, თუმცა მხოლოდ ახლომდებარე ლიმფური კვანძების ჩართვა, როგორც წესი, არ არის სარძევე ჯირკვლის კიბოს მეოთხე სტადია.

ძუძუს კიბოს სტატისტიკა

2020 წელს, მთელ მსოფლიოში, ქალებს შორის, ძუძუს კიბოს 2 261 419 ახალი შემთხვევა დაფიქსირდა. 2023 წელს, შეერთებულ შტატებში, დაახლოებით, 297 790 ქალს დაუსვეს ძუძუს ინვაზიური კიბოს დიაგნოზი, ხოლო 55 720 ქალს დაუდგინდება ძუძუს არაინვაზიური კიბოს დიაგნოზი. 2000-იანი წლების შუა პერიოდიდან, ქალებში ძუძუს ინვაზიური კიბო ყოველწლიურად, დაახლოებით, ნახევარი პროცენტით გაიზარდა. 

ამჟამად, შეერთებულ შტატებში, ძუძუს კიბო 4 მილიონ ქალს აქვს. მსოფლიოში, ქალებს შორის, სიკვდილის მეხუთე, წამყვანი მიზეზია ძუძუს კიბო. 2020 წელს, მთელ მსოფლიოში, 684 996 ქალი გარდაიცვალა ძუძუს კიბოთი.

სარძევე ჯირკვლის კიბო, როგორც წესი, დიაგნოზირებულია საშუალო ასაკისა და ხანდაზმულ ქალებში. დიაგნოსტიკის საშუალო ასაკია 63 წელი. მიუხედავად იმისა, რომ ეს არ არის გავრცელებული, ზოგიერთ ქალს დაავადების დიაგნოზი დაუსვეს 45 წლამდე.

ძუძუს კიბოს გადარჩენის მაჩვენებელი

არსებობს სხვადასხვა ტიპის სტატისტიკა, რომელიც ექიმებს ეხმარება, შეაფასონ ძუძუს კიბოსგან განკურნების შანსი, რასაც გადარჩენის სტატისტიკა ეწოდება. მნიშვნელოვანია, რომ ძუძუს კიბოს მქონე ადამიანების გადარჩენის მაჩვენებლების სტატისტიკა მხოლოდ სავარაუდოა. აშშ-ში, არამეტასტაზური ინვაზიური სარძევე ჯირკვლის კიბოს მქონე ქალების შედარებითი გადარჩენის ხუთწლიანი მაჩვენებელი 91%-ია, ხოლო შედარებითი გადარჩენის ათწლიანი მაჩვენებელი – 85%. ძუძუს კიბოს გადარჩენის მაჩვენებლები განსხვავდება და დამოკიდებულია რამდენიმე ფაქტორზე, მათ შორის, კიბოს სტადიაზე, ადამიანის ასაკსა და ზოგად ჯანმრთელობაზე.

თუ ინვაზიური სარძევე ჯირკვლის კიბო მდებარეობს მხოლოდ სარძევე ჯირკვალში, ამ დაავადების მქონე ქალების შედარებითი გადარჩენის ხუთწლიანი მაჩვენებელი 99%-ია. ქალების დაახლოებით 6%-ს აღენიშნება კიბო, რომელიც გავრცელებულია სარძევე ჯირკვლებისა და ლიმფური კვანძების გარეთ.