არასოდეს დააყენო საკუთარი ინტერესები პაციენტების ინტერესებზე წინ - ეს არის უმნიშვნელოვანესი თვისება, რომელსაც ექიმი უნდა ფლობდეს. მედიკოსისთვის კი მთავარი ჯილდო ნდობაა, რომელსაც პაციენტისგან იღებს, - თვლის ექიმი ნინო გაბიძაშვილი, რომელიც „ამერიკულ ჰოსპიტალ თბილისს“ საკუთარ გუნდთან ერთად შემოუერთდა. ნდობაზე დაფუძნებული გუნდური მუშაობა მისთვის პრიორიტეტულია. თვლის, რომ სწორედ ესაა პროფესიონალისთვის წარმატების ფორმულაც. ნინო გაბიძაშვილი „ამერიკულ ჰოსპიტალ თბილისში“ ენდოკრინოლოგიის დეპარტამენტს ხელმძღვანელობს. აცხადებს, რომ მისი სპეციალობისთვის ძალიან მნიშვნელოვანია ლოგიკური, ანალიტიკური აზროვნება და ფსიქოლოგიური უნარები. რადგან ენდოკრინული ჯირკვლების რეგულაციას აქვს ძალიან ლოგიკური მექანიზმები, ხოლო დიაბეტოლოგია და სიმსუქნის მართვა ექიმისგან მოითხოვს შეაცვლევინოს ადამიანს ცხოვრების წესი.